2024 yilning 6 dekabr kuni Toshkent shahridagi “Renessans” kino uyida mamlakatimizda fuqarolar jamiyatini rivojiga munosib hissa qoʻshgan respublika va xorijiy nodavlat notijorat tashkilotlari vakillarini “Fuqarolik jamiyatini rivojlantirishga qoʻshgan hissasi uchun” koʻkrak nishoni bilan taqdirlash marosimi oʻtkazildi.

Tashkil etilgan ushbu tadbirda Oliy Majlis Senati aʼzolari, Oliy Majlis Qonunchilik palatasi deputatlari, vazirlik va idoralar, xorijiy va respublika nodavlat notijorat tashkilotlari hamda OAV vakillari ishtirok etdi.

Taʼkidlash joiz, soʻnggi yillarda mamlakatimizda fuqarolik jamiyati institutlari uchun yangi davr boshlandi.

2017-2024 yillarda fuqarolik jamiyati institutlarini bevosita qoʻllab-quvatlash va samaradorligini oshirishga qaratilgan 64 ta normativ-huquqiy hujjat qabul qilinib, oʻziga xos huquqiy va institutsional baza yaratildi.

Oʻzbekiston tarixida birinchi marotaba qabul qilingan 2021–2025 yillarga moʻljallangan fuqarolik jamiyatini rivojlantirish konsepsiyasida sohani har tomonlama rivojlantirish va qoʻllab-quvvatlash, davlat va jamiyat boshqaruvida faol ishtirokini taʼminlash kabi ustuvor yoʻnalishlar belgilandi.

Davlat organlarining fuqarolik jamiyati institutlari bilan samarali va konstruktiv muloqot mexanizmlari yoʻlga qoʻyilib, nodavlat notijorat tashkilotlarining ehtiyojlarini tizimli tahlil qilish hamda davlat va jamiyatni yanada rivojlantirishning muhim masalalari boʻyicha oʻzaro fikr almashish uchun maydon yaratildi.

Bir soʻz bilan aytganda, mamlakatning har tomonlama va jadal rivojlanishida fuqarolik jamiyati institutlarining roli va ahamiyatini tubdan oshirish, ularning davlat hokimiyati va boshqaruvi organlari bilan hamkorligini kuchaytirish boʻyicha tizim yaratildi.

Davlatimiz rahbarining 2024 yil 26 avgustida imzolangan “Fuqarolik jamiyati institutlarini davlat tomonidan qoʻllab-quvvatlash tizimini yanada takomillashtirish chora-tadbirlari toʻgʻrisida”gi Farmon yuqoridagi islohotlarning uzviy davomi boʻlib, fuqarolik jamiyati institutlarini davlat tomonidan qoʻllab-quvvatlashning shaffof va sogʻlom raqobat tamoyiliga asoslangan tizimini, shuningdek, ijtimoiy samarali dasturlar samaradorligini oshirish uchun qoʻshimcha shart-sharoitlar yaratishga qaratilgan.

Ushbu Farmonga muvofiq oʻtkazilayotgan Fuqarolik jamiyati haftaligi istiqbolli tashabbuslarni ishlab chiqish, shuningdek, shaffoflik va inklyuzivlikni oshirish boʻyicha muloqot va keyingi qadamlarni belgilab olish uchun ochiq platforma boʻlib xizmat qilmoqda.

Fuqarolik jamiyati institutlarini shakllantirish va rivojlantirishga munosib hissa qoʻshgan respublika va xorijiy nodavlat notijorat tashkilotlari vakillarini “Fuqarolik jamiyatini rivojlantirishga qoʻshgan hissasi uchun” koʻkrak nishoni bilan taqdirlash marosimi esa haftalik doirasidagi muhim tadbirlardan biri boʻldi.

Maʼlumot oʻrnida, fuqarolik jamiyati institutlarining bu yuksak unvoni Prezidentimizning 2018 yilning 14 noyabridagi qarori bilan taʼsis etilgan edi. Oʻtgan davr mobaynida soha rivojiga munosib hissa qoʻshgan fuqarolik jamiyati institutlarining 126 nafar vakili mazkur koʻkrak nishoni bilan taqdirlangan.

Ushbu anʼanani davom ettirgan holda Oʻzbekiston Respublikasi Konstitutsiyasi kuni arafasida Parlament komissiyasining qaroriga muvofiq respublika va xorijiy nodavlat notijorat tashkilotlarining yana bir guruh vakillari “Fuqarolik jamiyatini rivojlantirishga qoʻshgan hissasi uchun” koʻkrak nishoni bilan taqdirlandi. Bugun koʻkrak nishoni bilan taqdirlanganlar orasida xorijliklarning (Ozarbayjon va Fransiya vakillari) ham borligi esa tadbirning ahamiyati va qamrovi kengayayotganidan dalolat beradi.

Tadbirda soʻzga chiqqanlar tomonidan Oʻzbekistonda davlat va jamiyat oʻrtasidagi oʻzaro ishonchni mustahkamlash, fuqarolik jamiyatini rivojlantirish, nodavlat notijorat tashkilotlarini qoʻllab-quvvatlash yoʻnalishida muhim islohotlar amalga oshirilayotgani, fuqarolar huquqini, demokratik qadriyatlarni himoya qilish, taʼlim, tibbiyot, madaniyat va boshqa sohalarda qariyb 10 mingta nodavlat notijorat tashkilotlar erkin faoliyat yuritayotgani, ularda 70 mingga yaqin ish oʻrni yaratilgani, davlat ijtimoiy loyihalarini amalga oshirishda fuqarolik jamiyati institutlari faol ishtirok etayotgani qayd etildi.

Fuqarolik jamiyati institutlari tomondan muhim tashabbuslar va ijtimoiy ahamiyatga ega boʻlgan loyihalarini qamrovini kengaytirish hamda  amalga oshirish borasida oʻzoro fikrlar almashilindi.

 

---

 

“Fuqarolik jamiyatini rivojlantirishga qo‘shgan hissasi uchun” ko‘krak nishoni bilan taqdirlanganlar RO‘YXATI

T/r	F.I.SH.	Tashkilot nomi
Xorijiy tashkilotlar
1.	Aliyeva Aygun Nazif qizi	Ozarbayjon Respublikasi nodavlat tashkilotlarini davlat tomonidan qo'llab-quvvatlash agentligi ijrochi direktori
2.	Philippe Barbier	“Ipak yo‘lidagi karvonsaroylar” uyushmasining O‘zbekistondagi filiali rahbari
Respublika tashkilotlari
3.	Alimova Vasila Sattorovna	Respublika bolalar ijtimoiy moslashuvi markazi direktori
4.	Raximova Nigina Xayrullayevna	“Ijtimoiy fikr” markazi direktori
5.	Shavkatov Otabek Sherzodovich	Yoshlar umumjahon assotsiatsiyasi raisi
6.	Mirzaxmedov Asrol Xodjiyevich	O‘zbekiston Mehr-shafqat va salomatlik jamoat fondi Boshqaruv raisi
7.	Abutalipov Abduaziz Abdulaziz o‘g‘li	O‘zbekiston Milliy media assotsiatsiyasi bosh direktori
8.	Shirinova Mavlyudaxon Rasulovna	“Sabr” Respublika ijtimoiy-iqtisodiy rivojlanish markazi direktori
9.	Tulyakov Eldor Sobirjonovich	“Taraqqiyot strategiyasi” markazi ijrochi direktori
10.	Formonov Azamjon Turg`unovich	O‘zbekiston inson huquqlari “Huquqiy tayanch” jamoat birlashmasi rahbari
11.	Qosimova Nargis Sunnat qizi	“Ekolog” jamoat birlashmasi rahbari
Qoraqalpog‘iston Respublikasi
12.	Allashova Malika Raxmanberdiyevna	“Yuksak salohiyat” jamoat birlashmasining Qoraqalpog‘iston filiali direktori
Andijon viloyati
13.	Ataxanov Farxodbek Abdumajidovich	Demokratik jarayonlarni tahlil qilish markazi Andijon viloyati hududiy bo‘linmasi rahbari
Buxoro viloyati
14.	Tillayev Baxtiyor	Buxoro viloyati “Mexrigiyo” jamoat fondi rahbari
Jizzax viloyati
15.	Qo`shboqova Ulbo`sin Soatovna	O‘zbekiston nogironlari jamiyati Paxtakor tumani bo‘limi rahbari
Qashqadaryo viloyati
16.	Chorshanbiyev Nasriddin Shodmonkulovich	O‘zbekiston “VETERAN” jangchi-faxriy va nogironlari birlashmasi Qashqadaryo viloyati bo‘limi raisi
Navoiy viloyati
17.	Raxmanova Nargiza Xaydarovna	Navoiy viloyati “Sogdiana” yoshlar va ayollar markazi rahbari
Namangan viloyati
18.	Ibragimova Nargiza Zokirjonovna	Namangan viloyati “Xotin-qizlar tadbirkorlik markazi” rahbari
Samarqand viloyati
19.	Kektisheva Olga Mixailovna	Samarqand viloyati “Nurbonu” nodavlat notijorat tashkiloti rahbari
Sirdaryo viloyati
20.	Usmanova Yulduzxon Mamatkulovna	“Sog‘lom avlod uchun” xalqaro xayriya fondi Sirdaryo viloyati hududiy filiali direktori
Surxondaryo viloyati
21.	Fyodorova Nina Aleksandrovna	O‘zbekiston rus madaniy markazi Surxondaryo viloyati bo‘limi rahbari
22.	Xodjaniyazova Gulnora Djabborovna	Surxondaryo viloyati “Ayol va zamon” ayollarning ijtimoiy-iqtisodiy faolligini oshirish markazi rahbari
Toshkent viloyati
23.	Мustаfаyеvа Shaxnoza Bаyzаkоvnа	Toshkent viloyati “DUGONALAR” nogiron ayollar jamiyati raisi
Farg‘ona viloyati
24.	Normatov Raxmatjon A`zamovich	Farg‘ona viloyati “Bolajon dunyosi” xayriya fondi rahbari
Xorazm viloyati
25.	Mexmonova Yulduzxon Baxriddinovna	“Sog‘lom avlod uchun” xalqaro xayriya fondi Xorazm viloyati hududiy filiali direktori
Toshkent shahri
26.	Vasikova Feruza Xamitovna	O‘zbekiston Nogironlar jamiyati Toshkent shahar bo‘limi raisi